হাউলীত নৱবিবাহিতাৰ ৰহস্যজনক মৃত্যুঃ স্বামী সহ দুজনক গ্ৰেপ্তাৰ
১১ জুন● হাউলীৰ কদমগুৰি গাঁৱত নৱ বিবাহিতাৰ ৰহস্যজনক মৃত্যুৰ ঘটনাক লৈ হাউলীত চাঞ্চল্যৰ সৃষ্টি হৈছে ৷ বিয়াৰ চাৰিদিন পিচতে ৰহস্যজনকভাৱে মৃত্যু মুখত পৰিল এগৰাকী নৱ বিবাহিতা ৷ মৃত নৱ বিবাহিতা গৰাকী ছানিয়াৰা পাৰবিন (১৮) ৷ বৰপেটাৰ সৰুক্ষেত্ৰীৰ বৰবালা গাঁৱৰ চিকন্দৰ আলিৰ কন্যা ছানিয়াৰা পাৰবিনৰ যোৱা শুক্ৰবাৰে হাউলী কদমগুৰি চ'কৰ দিলদাৰ হুছেইনৰ সৈতে বিবাহ অনুষ্ঠিত হৈছিল ৷ পিছে বিৱাহৰ চাৰিদিন পিচতে সোমবাৰে নিশা ৩ বজাত ৰহস্যজনকভাৱে মৃত্যুমুখত পৰে নৱ বিবাহিতা ছানিয়াৰা পাৰবিন ৷ অবশ্যে আজি পুৱাহে ছানিয়াৰাৰ মৃত্যুৰ খবৰ পায় পিতৃৰ পৰিয়ালৰ লোকে ৷ নৱ বিবাহিতা গৰাকীৰ স্বামীৰ পৰিয়ালে জনোৱামতে, উচ্চ ৰক্তচাপত ভূগি আছিল ছানিয়াৰা পাৰবিনে ৷ যাৰ ফলত ন-বোৱাৰী গৰাকীয়ে মৃত্যু মুখত পৰে । ইপিনে মৃতদেহৰ নাক-মুখ, হাত, বিচনা চাদৰ আদিত লাগি থকা তেজৰ চেকুৰা প্ৰত্যক্ষ কৰি নৱ বিবাহিতাগৰাকীক হত্যা কৰাৰ সন্দেহ কৰিছে পৰিয়ালৰ লোকে ৷ ইতিমধ্যে হত্যাৰ সন্দেহত মৃত ছানিয়াৰাৰ স্বামী দিলদাৰ হুছেইনৰ লগতে তেওঁৰ দুই ভাতৃ আৰু মাতৃৰ বিৰুদ্ধে হাউলী থানাত এজাহাৰ দাখিল কৰিছে ছানিয়াৰা পাৰবিনৰ পিতৃৰ পৰিয়ালে ৷ অবশ্যে স্বামীৰ পৰিয়ালৰ দাবী নিশা উচ্চ ৰক্তচাপত ভূগি মৃত্যুমুখত পৰিছে নৱবিবাহিতা ছানিয়াৰা ৷ ইতিমধ্যে হাউলী থানাৰ আৰক্ষী উপস্থিত হৈ ঘটনাৰ তদন্ত আৰম্ভ কৰাৰ লগতে অভিযুক্ত দিলদাৰ হুছেইন আৰু এজন ভাতৃক আৰক্ষীয়ে গ্ৰেপ্তাৰ কৰিছে ৷ আনহাতে তেওলোকৰ পিতৃকো সোধপোচৰ বাবে আৰক্ষীয়ে আটক কৰিছে । পৰিয়ালে জনোৱামতে, মৃত ছানিয়াৰা পাৰবীন দিলদাৰ হুছেইনৰ মাহীয়েকৰ ছোৱালী ৷ সামাজিক ৰীতি নীতি মতেই বিয়া হৈছিল ছানিয়াৰা পাৰবিন আৰু দিলদাৰ হুছেইনৰ ৷ আৰক্ষীৰ সঠিক তদন্তৰ পিছতে নৱ বিবাহিতাৰ ৰহস্যজনক মৃত্যুৰ প্ৰকৃত ঘটনাটো পোহৰলৈ আহিব ।
